Psalm 41 WLC 1למנצח מזמור לדוד׃ אשרי משכיל אל־דל ביום רעה ימלטהו יהוה׃ 2יהוה ׀ ישמרהו ויחיהו [יאשר כ] (ואשר ק) בארץ ואל־תתנהו בנפש איביו׃ 3יהוה יסעדנו על־ערש דוי כל־משכבו הפכת בחליו׃ 4אני־אמרתי יהוה חנני רפאה נפשי כי־חטאתי לך׃ 5אויבי יאמרו רע לי מתי ימות ואבד שמו׃ 6ואם־בא לראות ׀ שוא ידבר לבו יקבץ־און לו יצא לחוץ ידבר׃ 7יחד עלי יתלחשו כל־שנאי עלי ׀ יחשבו רעה לי׃ 8דבר־בליעל יצוק בו ואשר כב לא־יוסיף לקום׃ 9גם־איש שלומי ׀ אשר־בטחתי בו אוכל לחמי הגדיל עלי עקב׃ 10ואתה יהוה חנני והקימני ואשלמה להם׃ 11בזאת ידעתי כי־חפצת בי כי לא־יריע איבי עלי׃ 12ואני בתמי תמכת בי ותציבני לפניך לעולם׃ 13ברוך יהוה ׀ אלהי ישראל מהעולם ועד העולם אמן ׀ ואמן׃ Hebrew OT: WLC (Consonants Only) For comparative study, where possible, chapter and verse numbers on Biblos.com sites are mapped to the traditional convention used by the KJV, NASB, NIV and others. Bible Hub |
    |