Psalm 59 BHS 1למנצח אל־תשחת לדוד מכתם בשלח שאול וישמרו את־הבית להמיתו׃ הצילני מאיבי אלהי ממתקוממי תשגבני׃ 2הצילני מפעלי און ומאנשי דמים הושיעני׃ 3כי הנה ארבו לנפשי יגורו עלי עזים לא־פשעי ולא־חטאתי יהוה׃ 4בלי־עון ירוצון ויכוננו עורה לקראתי וראה׃ 5ואתה יהוה־אלהים צבאות אלהי ישראל הקיצה לפקד כל־הגוים אל־תחן כל־בגדי און סלה׃ 6ישובו לערב יהמו ככלב ויסובבו עיר׃ 7הנה יביעון בפיהם חרבות בשפתותיהם כי־מי שמע׃ 8ואתה יהוה תשחק־למו תלעג לכל־גוים׃ 9עזו אליך אשמרה כי־אלהים משגבי׃ 10אלהי [כ חסדו] [ק חסדי] יקדמני אלהים יראני בשררי׃ 11אל־תהרגם פן־ישכחו עמי הניעמו בחילך והורידמו מגננו אדני׃ 12חטאת־פימו דבר־שפתימו וילכדו בגאונם ומאלה ומכחש יספרו׃ 13כלה בחמה כלה ואינמו וידעו כי־אלהים משל ביעקב לאפסי הארץ סלה׃ 14וישובו לערב יהמו ככלב ויסובבו עיר׃ 15המה [כ ינועון] [ק יניעון] לאכל אם־לא ישבעו וילינו׃ 16ואני אשיר עזך וארןן לבקר חסדך כי־היית משגב לי ומנוס ביום צר־לי׃ 17עזי אליך אזמרה כי־אלהים משגבי אלהי חסדי׃ Hebrew OT: BHS (Consonants Only) The text has been made available for scholarly, non-commercial applications. Please see the complete user declaration. For comparative study, where possible, chapter and verse numbers on Bible Hub sites are mapped to the traditional convention used by the KJV, NASB, NIV and others. Bible Hub |
    |